Idul Adha ngajaraké yèn kekuatan sejati bangsa ora mung ana ing pucuk pimpinan, nanging uga ana ing ati lan tindak-tanduk saben wargané, kalebu para siswa. Semangat kurban, gotong royong, lan rasa tanggung jawab kudu terus ditandur lan dirumat, awit saka kuwi kabèh, jiwa patriotik bangsa bakal tetep urip lan sumunar.
penulis : Nanang Priyo Basuki – jurnalis kediritangguh.co
Idul Adha sejatiné ora mung dadi ajang ritual keagamaan sing sakral, nanging uga ngandhut piwulang-piwulang urip kang luhur. Ing saben tetes makna kurban, ana nilai pengabdian, ketulusan, lan kesetiaan marang dhawuhe Gusti Allah.
Nanging luwih saka kuwi, Idul Adha bisa dadi pangeling-eling tumrap kita kabèh yèn rasa patriotisme lan kepedulian sosial iku kudu terus diuri-uri, digedhekaké, lan diwujudaké ing tindakan nyata.
Kurban sing diparingaké Nabi Ibrahim lan Nabi Ismail ora mung soal keimanan pribadi, nanging nglambangaké kesanggupan manungsa kanggo ngorbanaké apa waé demi kabecikan sing luwih gedhé. Iki bisa dadi gambaran patriotisme sejati: pasrah, ikhlas, lan wani ngorbanaké kepentingan pribadi demi bangsa lan negara.
Ngemot Nilai Pancasila
Ing jero kisah kurban kuwi, kita bisa nemokaké nilai-nilai luhur sing selaras karo Pancasila. Saka sila kapisan nganti kaping lima, kabeh bisa digambaraké saka tindak Nabi Ibrahim lan Ismail. Tanggung jawab moral, kepatuhan marang prinsip, lan kepedulian marang sesama iku dudu wacana kosong. Kuwi kudu dadi laku, kudu dadi budaya, kudu dadi watak.
Nilai-nilai iki cocok banget karo semangat zaman saiki, nalika bangsa iki butuh luwih akèh manungsa-manungsa jujur lan tanggung jawab. Nanging, ora mung saka para pemimpin, nanging uga saka generasi mudha sing saiki isih lungguh ing bangku sekolah.
Saka Madrasah Keurip, Tekad Para Siswa SMKN 1 Kediri
Conto nyata saka piwulang Idul Adha iki bisa kita deleng ing SMKN 1 Kediri. Ing tengah godhangan kabar miring lan ujian marang integritas institusi, ratusan siswaé padha jejeg, bareng-bareng nglumpuk, lan tumindak sing adiluhung: njaga nama apik almamater lan ngluhuraké martabat kepala sekolahé.
Aksi solidaritas iki ora njalari kerusuhan, ora nganggo kekerasan. Nanging kanthi tertib, adhem ayem, para siswa nuduhaké yèn karepé mung siji: ngadeg bareng kanggo nglindhungi apa sing dadi duwé bebarengan. Kuwi dudu mung sekolahé, nanging nilai, rasa hormat, lan tanggung jawab sosial.
Ana sing kandha, “Iki dudu urusan politik, iki soal rego diri.”
Lha kuwi bener. Para siswa iku sejatine wis ngetrapké makna kurban: ngorbanaké kenyamanan lan waktu pribadi demi ngajèni martabat lan nilai bebarengan. Kuwi sing jenengé “kurban sosial”—dudu nganggo wedhus, nanging nganggo rasa lan aksi.
Gotong Royong, Nalar Sosial Kang Urip
Apa sing ditindakaké para siswa iki sejatiné minangka bukti yèn nilai gotong royong lan kepedulian sosial isih urip. Ing jaman saiki, nalika kabèh cenderung mikir dewe-dewe, sikap kaya ngéné kaya oase ing tengah padang garing.
Para siswa wis nuduhaké yèn merawat nama apik, ngajèni guru, lan njaga kehormatan lembaga iku dudu tanggung jawab kepala sekolah utawa guru waé, nanging uga tanggung jawab siswa. Iki piwulang moral sing ora ana ing buku teks, nanging bisa ngendhog ing ati lan tumindak saben bocah.
Idul Adha Ora Mung Ritual, Nanging Revolusi Moral
Idul Adha dadi pangeling-eling yèn bangsa iki bisa lestari yèn warga-wargané nduwèni rasa tresna tanah air sing diwujudaké karo tumindak nyata. Kaya sing dituduhaké para siswa SMKN 1 Kediri, kita butuh luwih akèh “kurban-kurban sosial”: ngalah demi kebenaran, nyengkuyung demi bebarengan, lan jaga martabat demi masa depan.
Lan sapa sing ngira yèn kabèh iku bisa dimulai saka pekarangan sekolah?
redaksi : Sebelumnya kami minta maaf bila membuat karya jurnalistik dengan Berbahasa Jawa, tidak lain agar cara kami menyampaikan pesan kepada pembaca mengingatkan kita semua hidup hidup di Tanah Jawa
